മെറ്റയുടെ മെസേജിംഗ് പ്ലാറ്റ്ഫോമായ വാട്ട്സ്ആപ്പിന്റെ ഉപയോക്താക്കള് വലിയ ഭീഷണിയില്. വാട്ട്സ്ആപ്പിന്റെ വെബ്, ഡെസ്ക്ടോപ്പ് പതിപ്പുകളില് ഉപയോക്താക്കളെ ലക്ഷ്യമിട്ടുള്ള ഒരു മാല്വെയര് ക്യാമ്പൈയിന് കണ്ടെത്തി. സൈബര് സുരക്ഷാ സ്ഥാപനമായ കാസ്പെര്സ്കിയുടെ അഭിപ്രായത്തില് മാല്വെയര് വ്യാപിപ്പിക്കാന് സൈബര് കുറ്റവാളികള് വാട്ട്സ്ആപ്പ് അക്കൗണ്ടുകള് ഉപയോഗിക്കുന്നുണ്ട്. ഇതുമായി ബന്ധപ്പെട്ട് വിവിധ രാജ്യങ്ങളില് നിരവധി കേസുകളാണ് റിപ്പോര്ട്ട് ചെയ്തിരിക്കുന്നത്. മലേഷ്യയിലെ ഉപയോക്താക്കളെയാണ് ഇത് ഏറ്റവും കൂടുതല് ബാധിച്ചത്.
കാസ്പെര്സ്കി ഗവേഷകര് പറയുന്നത് സൈബര് ആക്രമണകാരികള് മാല്വെയര് പ്രചരിപ്പിക്കുന്നതിനായി തട്ടിയെടുക്കപ്പെട്ട വാട്ട്സ്ആപ്പ് അക്കൗണ്ടുകള് ഉപയോഗിക്കുന്നുണ്ടെന്നാണ്. ഈ ആക്രമണത്തിന്റെ ഏറ്റവും വലിയ അപകടം സൈബര് ആക്രമണകാരികള് അയയ്ക്കുന്ന മാല്വെയര് അറ്റാച്ചുമെന്റുകള് വാട്സ് ആപ്പ് ഉപയോക്താവിന് അവരുടെ കോണ്ടാക്റ്റുകളില് നിന്നുള്ള ഫയലുകളായി തോന്നും എന്നതാണ്. ബാങ്ക്, അക്കൗണ്ട് സ്റ്റേറ്റ്മെന്റുകള് പോലെയുളളതെന്ന് തോന്നിപ്പിക്കുന്ന തരത്തിലാണ് ഈ അറ്റാച്ചുമെന്റുകള്ക്ക് പേരിട്ടിരിക്കുന്നത്. അതിനാല്, ഉപയോക്താക്കള് അധികം ആലോചിക്കാതെ ആ ഫയലുകള് തുറക്കുന്നു.
ഈ ഫയലുകള് തുറന്നാലുടന് ഇത് ഒരു ബാഹ്യ ഉറവിടത്തില് നിന്ന് മാല്വെയര് ഇന്സ്റ്റാള് ചെയ്യുന്നു. മാല്വെയര് ഇന്സ്റ്റാള് ചെയ്തുകഴിഞ്ഞാല് ആക്രമണകാരിക്ക് ഉപകരണത്തിലേക്ക് പൂര്ണ്ണ ആക്സസ് ലഭിക്കുകയും ഉപകരണത്തില് നിന്ന് ഡാറ്റയും മറ്റ് വിവരങ്ങളും മോഷ്ടിക്കാന് കഴിയുകയും ചെയ്യും. കൂടാതെ നിങ്ങളുടെ സിസ്റ്റത്തില് നിന്ന് മറ്റ് സിസ്റ്റങ്ങളെ ഹാക്ക് ചെയ്യാനും ഹാക്കര്മാര്ക്ക് മാല്വെയര് ഉപയോഗിക്കാം.
ഇംഗ്ലീഷ് ഒഴികെയുള്ള ജര്മ്മന്, ഫ്രഞ്ച്, പോര്ച്ചുഗീസ് തുടങ്ങിയ ഭാഷകളിലാണ് മാല്വെയര് ഫയലുകള്ക്ക് പേരുകള് നല്കിയിരിക്കുന്നതെന്ന് ഗവേഷകര് പറയുന്നു. മലേഷ്യയ്ക്ക് പുറമേ വിയറ്റ്നാം, തായ്വാന്, സിംഗപ്പൂര്, ബ്രസീല് എന്നിവിടങ്ങളിലെ ഉപയോക്താക്കളും ഇത്തരം ആക്രമണങ്ങള്ക്ക് ഇരയാകുന്നു. ഇത് സംഭവിക്കുന്നത് തടയാന് ഗവേഷകര് ചില വഴികള് നിര്ദ്ദേശിക്കുന്നു.
.vbs, .vbe, .exe, .bat, .cmd, .js, അല്ലെങ്കില് .ps1 പോലുള്ള എക്സ്റ്റന്ഷനുകളുള്ള ഒരു ഫയല് തുറക്കരുത്. അത്തരം എക്സ്റ്റന്ഷനുകളുള്ള ഒരു കോണ്ടാക്റ്റില് നിന്ന് നിങ്ങള്ക്ക് ഒരു അഭ്യര്ത്ഥന ലഭിച്ചിട്ടുണ്ടെങ്കില് മാത്രം ആ ഫയല് തുറക്കുക.
വാട്ട്സ്ആപ്പും നിങ്ങളുടെ ഫോണിന്റെയോ കമ്പ്യൂട്ടറിന്റെയോ സോഫ്റ്റ്വെയറും എപ്പോഴും അപ്ഡേറ്റ് ചെയ്ത് സൂക്ഷിക്കുക.
Content Highlights : Users of Meta's messaging platform WhatsApp are under a major threat. A malware campaign targeting users on the web and desktop versions of WhatsApp has been discovered.